ریاست کو یرغمال بنا کر مطالبات نہیں منوائے جا سکتے، لانگ مارچ ختم کیا جائے: رانا ثنا اللہ کی پریس کانفرنس

اسلام آباد (نیوز ڈیسک) — وزیراعظم کے مشیر برائے سیاسی امور رانا ثنا اللہ نے اسلام آباد میں پریس کانفرنس کرتے ہوئے دوٹوک الفاظ میں کہا ہے کہ ریاست کو یرغمال بنا کر اور سیاسی عدم استحکام کے ذریعے کوئی بھی مطالبہ نہیں منوایا جا سکتا، اس لیے پاکستان تحریک انصاف (پی ٹی آئی) کو چاہیے کہ وہ وزیراعظم کی مذاکرات کی پیشکش قبول کرتے ہوئے اپنا دھرنا اور لانگ مارچ منسوخ کر دے۔ انہوں نے تنقید کرتے ہوئے کہا کہ پی ٹی آئی ذاتی ایجنڈے کو قومی مفاد پر ترجیح دے رہی ہے اور ملک میں گالم گلوچ اور عدم برداشت کے کلچر کو فروغ دیا گیا ہے۔

رانا ثنا اللہ نے دعویٰ کیا کہ خیبرپختونخوا کے عوام نے لانگ مارچ کو یکسر مسترد کر دیا ہے اور مارچ کے شرکاء کی تعداد چند ہزار سے زیادہ نہیں ہو سکی۔ دہشت گردی کے معاملے پر بات کرتے ہوئے انہوں نے واضح کیا کہ خیبرپختونخوا میں کوئی نیا فوجی آپریشن نہیں ہونے جا رہا اور نہ ہی کوئی نئے آئی ڈی پیز (IDPs) بنائے جائیں گے، البتہ صوبائی حکومت کو دہشت گردی کے خلاف پالیسی پر موثر عملدرآمد کرنا چاہیے۔ انہوں نے انکشاف کیا کہ وزیراعلیٰ سہیل آفریدی نے 11 ماہ میں ایپکس کمیٹی کا صرف ایک اجلاس بلایا ہے، جبکہ صوبے کے 5 اضلاع میں پولیس اسٹیشن تک موجود نہیں ہیں اور 17 ہزار پولیس آسامیاں خالی پڑی ہیں۔ انہوں نے خیبرپختونخوا پولیس اور آئی جی کی قربانیوں اور جرات کو سراہتے ہوئے کہا کہ پولیس اور سی ٹی ڈی کو درکار بجٹ اور وسائل فراہم کیے جانے چاہئیں۔