برازیل/آسٹریلیا (نیوز ڈیسک) — دنیا کے معمر ترین اور دوسرے معمر ترین زندہ مردوں نے اپنی 114 ویں اور 113 ویں سالگرہ کے موقع پر ایک دوسرے کو منفرد انداز میں مبارکباد دی ہے۔ گینیز ورلڈ ریکارڈز کے مطابق برازیل سے تعلق رکھنے والے ژوا مارینہو نیٹو 114 برس کے ہو گئے ہیں جبکہ آسٹریلیا کے کین ویکس نے اپنی 113 ویں سالگرہ منائی ہے۔ دنیا کے دو مختلف براعظموں میں مقیم ان دونوں معمر ترین شخصیات نے تصاویر کے تبادلے کے ذریعے ایک دوسرے کو سالگرہ کی مبارکباد پیش کی، جن میں دونوں معمر افراد ایک دوسرے کے لیے مبارکبادی کارڈ تھامے ہوئے نظر آئے۔
واضح رہے کہ ژوا مارینہو نیٹو نومبر 2024 میں 112 برس کی عمر میں دنیا کے معمر ترین زندہ مرد بنے تھے اور تب سے یہ اعزاز انہی کے پاس ہے۔ دوسری جانب، دنیا کی مجموعی معمر ترین خاتون ہونے کا اعزاز ایتھل کیتھرہیم کے پاس ہے جو چند ماہ قبل 117 برس کی عمر کو پہنچ چکی ہیں۔