پاکستان تحریک انصاف نے اسلام آباد کی جانب جاری لانگ مارچ کے روٹ میں تبدیلی کردی ہے۔ وزیراعلیٰ خیبرپختونخوا سہیل آفریدی نے اعلان کیا ہے کہ مارچ کا قافلہ منگل کی رات کوہاٹ سے خیبر ضلع جائے گا، جس کے بعد پشاور پہنچے گا۔
کوہاٹ کے یونیورسٹی چوک پر لانگ مارچ کے شرکا سے خطاب کرتے ہوئے سہیل آفریدی نے کہا کہ خیبر ضلع کے عوام نے مارچ کے شرکا کی میزبانی کی خواہش ظاہر کی، جس کے باعث قافلے کا روٹ تبدیل کیا گیا۔
انہوں نے بتایا کہ خیبر ضلع کے بعد قافلہ پشاور روانہ ہوگا۔ ابتدائی پلان کے مطابق کوہاٹ سے قافلے کو براہ راست پشاور جانا تھا اور مٹنی کے قریب رات قیام کا پروگرام تھا۔
وزیراعلیٰ کے مطابق پی ٹی آئی اپنے مطالبات سے پیچھے نہیں ہٹے گی اور لانگ مارچ پرامن انداز میں جاری رکھا جائے گا۔ ان کا کہنا تھا کہ احتجاج کا راستہ اختیار کرنے سے قبل تمام آئینی، قانونی اور جمہوری ذرائع استعمال کیے گئے۔
سہیل آفریدی نے کہا کہ پی ٹی آئی کے مطالبات میں بانی پی ٹی آئی عمران خان تک رسائی اور ان کے طبی علاج کی سہولت شامل ہے، جبکہ پارٹی نے اپنے مطالبات کا مسودہ بھی سامنے رکھا ہے۔
انہوں نے خیبرپختونخوا میں انسدادِ دہشتگردی پالیسی پر تنقید کرتے ہوئے دعویٰ کیا کہ مختلف آپریشنز اور ڈرون حملوں کے باوجود دہشتگردی کا مسئلہ ختم نہیں ہوسکا۔ ان کے مطابق تجویز کردہ پالیسی کے ذریعے 100 روز میں صوبے میں امن بحال کیا جاسکتا ہے۔
پی ٹی آئی کا لانگ مارچ 4 اکتوبر کو لکی مروت سے شروع ہوا تھا اور قافلہ کرک سے ہوتا ہوا کوہاٹ پہنچا۔
نئے روٹ کے مطابق اب خیبر ضلع کو پشاور سے پہلے شامل کیا گیا ہے، جبکہ پی ٹی آئی کے مطابق لانگ مارچ کے پہلے مرحلے کا بڑا قافلہ 8 اکتوبر کو خیرباد میں جمع ہوگا، جہاں آئندہ کے لائحہ عمل کا اعلان کیا جائے گا۔